06.02.2023-cü ildə qardaş Türkiyədə baş vermiş təbiətin ən amansız faciəsi-zəlzələsi bütün soydaşlarım kimi, məni də sarsıtdı.

Bu təbii fəlakət nə qədər sarsıdıcı və amansız olsa da,həm də TÜRKÜN böyüklüyünü, bəşəri əzəmətini göstərdi.

Dünya bir daha gördü ki, TÜRKİYƏ adlanan TANRI ÖLKƏSİ  hər sınağa, təbii fəlakətə baş əyən TÜRKİYƏ deyil…

Əziz oxucu ;

İllər öncəsi bu duyğu ilə yazdığım, zamanında mətbuatda və kitablarımda yayımlanan, mənə elə gəlir ki, bu gün də gərəkliyini itirməyən “Türkə ağı demək olmaz” şeirimi, təkrar olsa da, Sizinlə bölüşməyi özümə mənəvi borç bildim.

ALLAH TÜRKÜ QORUSUN!!!..

Dərin hörmət və sayğılarla

Xanəli Kərimli

08.02.2023

TÜRKƏ AĞI DEMƏK OLMAZ

17 avqust 1999-cu il Türkiyədə

baş vermiş zəlzələnin törətdiyi

ağır faciəyə ağılar yazıldı...

Türkə ağı demək olmaz,

Türk Tanrının törəsidir.

Quru daş da bilir ki, o,

Yer üzünün haqq səsidir.

Minillərin tarixini

Bir arayın varaq-varaq,

Görün, hansı sorununu

Türk həll edib ağlayaraq?!

Türk yaranan gündən bəri

Tanrı çəkir sınağına.

Qoca Türk baş əyərmi heç

Bir zəlzələ qınağına?!

Türkə ağı demək olmaz!

Lap ölüm ayağında da.

Türkə türkü oxuyublar

Ən dözülməz çağında da...

Haqdan gələn bəlanı da

Haqdan gələn sevgi bilib.

Onunçun də ulu Türküm

Haqq dərgahına yüksəlib.

Yaxşı bilir türk oğlu türk

Öz soyunun nişanəsin.

Qoy yazılsın yaddaşına

Qələm tutan hər bir kəsin:

– Türkə ağı demək olmaz!

Türk Tanrının törəsidir!

Qınına sığmayan qılınc ,

Ünlü döyüş nəğməsidir.

02.10.1999